( १७० )  आम नेपालीको मतको अवहेलना गर्नेहरुलाई पाप लाग्ने छ ।

( १७० )  आम नेपालीको मतको अवहेलना गर्नेहरुलाई पाप लाग्ने छ ।
            दैनिक जीवनका अनुभवहरु
           २०७२ साल भाद्र २९ गते मंगलवार

    संविधान सभाले प्रारम्भिक मस्यौदा गरेको नेपालको संविधानमा आम नेपालीबाट राय सुझाव संकलन गर्दा देशलाई हिन्दू राष्ट्र कायम गराउनु पर्छ भनी ९० ( नम्बे ) प्रतिशतभन्दा बढी जनमानसले आफ्नो अभिमत जाहेर गरेका थिए । तर त्यस अभिमतलाई तीन ठूला दलले अनादर गरे । अवहेलना गरे । धार्मिक भावनामा बज्रपात गरे । नेपाललाई ” धर्मनिरपेक्ष” कायम गर्ने प्रस्ताव बहुमतले पारित गराए ।सनातनी धर्म परायण जनमानसको हृदयमा आघात पु-याए ।बहुमतको घोडा चढेर बहादुरी देखाए । आज हिन्दु धर्मावलम्बिहरु अवाक छन् । निराश छन् । आफूले चुनी पठाएका प्रतिनिधिले आफ्नै चीर हरण गरेकोमा प्रताडित छन् । राम्रो भएन । विश्वकै गौरव हरण भयो ।आम नेपालीको मतको अवहेलना गर्नेहरुलाई पाप लाग्ने छ । 

क्या राम्री !

( १६९ ) दैनिक जीवनका अनुभवहरु
२०७२ साल भाद्र २८ सोमवार

क्या राम्री ।

चन्द्रमा त दागी छ ।
तिमी त बेदाग छ्यौ ।
क्या राम्री ।

मृग नयनमा पनि गाजल,
ती नयनाभिराम नयन,
क्या राम्री ।

पूर्ण श्रृँगारमा सजिएकी प्रकृति,
त्यो कृत्रिम श्रृँगार किन चाहियो ?
क्या राम्री ।

रसिला ओंठहरु
चुम्बन खोजी रहन्छन् ।
तीनमा लिपपोत किन गर्ने ?
क्या राम्री

प्रकाशको पुन्ज त्यो मुखमण्डल ।
लाली त्यहां किन चाहियो ?
क्या राम्री ।

चन्द्रमा त दागी छ ।
तिमी त बेदाग छ्यौ ।
क्या राम्री ।

नितम्ब तलै झरेको केश लहरी,
छालझैं सागरमा ।
क्या राम्री ।

फिक्का हुंने शिल्पिको कला पनि,
त्यो चन्द्रवदन
क्या राम्री ।

रमाउने आफ्नै संस्कृतिमा,
हाकु पतासीमा यो ल्यासे,
क्या राम्री ।

मर्काई पातुलो कम्मर,
अनार दाना दाँत देखाउने चाल,
क्या राम्री ।

आपतकै आँधी छेक्ने …
हिमालझैं अविचल,
साहसी व्यक्तित्व,
क्या राम्री ।

चन्द्रमा त दागी छ
तिमी त बेदाग छ्यौ ।
क्या राम्री ।
-२०७१ पुस ७

 ( १६८ ) दायित्व बोधको पर्व – पिता सम्मान दिवस ।

 ( १६८ ) दायित्व बोधको पर्व – पिता सम्मान दिवस ।
           दैनिक जीवनका अनुभवहरु
           २०७२ भाद्र २७ गते आइतवार
आज भाद्र औंसी । नेपाल भाषा ( नेवारी ) मा “ब्वाया ख्वा स्वेगु औंसी।”  नेपाली भाषामा ” पिता सम्मान दिवस ।” सर्वसाधारणको बोलाचालीमा ” बाउ खुवाउने औंसी।” अंग्रेजीमा ” Father’ Day”.

बुबा हुंने छोराछोरीले आफ्नो जन्मदाता लालन पालन कर्तालाई  सम्झेर सम्मान गर्नु पर्ने । छोराछोरी वयस्क भए,परिवारमा संगै भए पितालाई दैनिक जीवनका क्रियाकलापमा काँधमा काँध मिलाइ सहयोग गर्नु पर्ने ।स्वदेशैमा नोकरी व्यवसायको सिलसिलामा घरदेखि टा-ढा भए  निरन्तर संचार संपर्कमा रही रहेर निर्देशन, सर सल्लाह अनुसार कार्य सम्पादन गर्ने । विदा मिलाइ वा विदाको बेलामा घर आई सपोर्ट गर्ने । धेरै टाढा विदेशमा रहे हप्ता, पन्द्र दिनमा सामाजिक संजाल मार्फत सन्चो बिसन्चो सोधनी गरेर भावनात्मक सम्बन्धको गाँठो कसेर राख्नु पर्ने । संभव भए मातापितालाई बोलाइ भ्रमण गराउनु पर्ने । बढीमा दुई वर्षको समयको अन्तरालमा आफ्नो थातथलोमा फर्कनु पर्ने । परिवार र स्वदेशसंग पारिवारिक, सामाजिक, धार्मिक – साँस्कृतिक र राजनैतिक सम्बन्ध नवीकरण गर्न पर्ने । बृद्ध मातापिता भए पारिवारिक वातावरणमा संगै बसी सेवा गर्नु पर्ने । उनीहरुलाई बृद्धाश्रममा राख्ने योजना बनाउने भूल नगर्ने ।
यी नै हुंन् नेपालको धर्म, संस्कृति र नैतिकता अनुसार छोराछोरीले पितामाताप्रति वहन गर्नु पर्ने कर्तब्य र दायित्वहरु । नेपाल आमाका सन्ततिहरु कर्तब्यनिष्ठ भई यीनै कामनाहरु परिपूर्ती गर्न सफल होऊन् । यही शुभेच्छा राख्दछु ।

(१६७ )राष्ट्रिय राजनीतिको धार समन्वयकारी हुनु पर्दछ ।

( १६७ ) राष्ट्रिय राजनीतिको धार समन्वयकारी हुनु पर्दछ ।
           दैनिक जीवनका अनुभवहरु
           २०७२ भाद्र २६ गते शनिवार
हिमाल,पहाड र तराई एकीकृत भई नेपालको भूगोल बनेको हो । संविधान सभा – २ ले नयाँ संविधान लेख्ने प्रक्रिया पूरा गर्न लागेको बेलादेखि सीमाँकन र प्रदेशमा समावेसी मुद्दालाई लिएर तराई मधेसको दैनिक जन जीवन  
आन्दोलित भएको छ । सुरक्षाकर्मीहरुको गोली लागी सर्वसाधारणको ज्यान गएको छ । आन्दोलनकारीहरुको क्रुरतामा परेर प्रहरी हाकिम र जवानहरुको हिंसक तरिकाबाट मृत्यु भएको छ । सम्पूर्ण तराई-मधेश आन्दोलित छ । सद्भाव र शान्ति खलबल हुनेगरी हिंसा बढेको छ । देशको एउटा भू-भाग रक्तरंजित छ । तर अर्को भूभाग- राजधानीमा संविधान लेखनको हतार छ ।जलेको तराई-मधेशलाई संबोधन नगरी संविधान ल्यायो भने त्यो चीरकालसम्न दीगो हुन सक्दैन । निषेधको राजनीति त्याज्य छ । सहमतिको विन्दुमा सबै आउनु नै पर्दछ । राष्ट्रिय राजनीतिको धार समन्वयकारी हुनु पर्दछ । २४० वर्षदेखि तराई सशक्तिकरण हुंन पाएको थिएन । त्यसकै उपज हो त्यो आन्दोलन । अब विगतबाट पाठ सिकेर राष्ट्रिय राजनीतिको धार समन्वयकारी हुनु पर्दछ । दंभ र प्रमाद कसैले नदेखावस् ।आन्दोलनकारी पनि वार्ताको टेबुलमा आई आफ्नो हक अधिकारकोलागि बहस गर्नु पर्दछ । संविधान सभा बाईकट गरेर हल निक्लंदैन, माननीयहरु । तपाईहरुलाई जनताको अभिमत के छ ? संविधान सभा भित्रै बहस र तर्क गरेर समस्या समाधान गर्नु पर्दछ । 

 

( १६६ )  संविधान लेखन प्रक्रिया राष्ट्रिय स्वार्थकोलागि स्थगन होस् केही दिन ।

( १६६ )  संविधान लेखन प्रक्रिया राष्ट्रिय स्वार्थकोलागि स्थगन होस् केही दिन ।
           जल्दा बल्दा समस्या संबोधन होस् ।
           २०७२ साल भाद्र २५ गते शुक्रवार 
पूरै तराई मधेस आन्दोलित भएको छ । सरकारी कार्यालयहरु धमाधम आगजनी हुंदैछन् ।सर्वसाधारण अराजनैतिक ब्यक्तिहरु र किशोरहरु पुलिसको गोली लागी मृत्यु भएका छन् ।सुरक्षाकर्मीहरु मानिने क्रम रोकिोएको छैन ।  बन्द आदिले आम जनजीवन कष्टकर भएको छ ।उद्योग, ब्यापार व्यवसाय चौपट भएका छन् । त्रसित छन् सर्वसाधारण । अप्रिय घटना घटीहाल्छ कि भन्ने आशंका भई रहन्छ ।

यता काठमाण्डौंमा संविधान जारी गरी हाल्नु पर्ने हतारमा छन् , प्रमुख तीन दलका नेतागण । राप्रपा ( नेपाल ) संघारैमा आएर प्रक्रियाबाट अलग भएको छ । निषेधको राजनीति भयो भन्छ , राप्रपा नेपाल । तराई आधारित दलहरू पहिल्यै छाडी सके । गच्छदारको गठबन्धन पनि अलगियो । संविधान रक्तरंजित हुन जाला भनी हरेक सचेत नागरिक चिन्तित छन् । यस्तो हालतमा संविधान मात्र लेखेर जारी गर्दा नेपाली मात्रको पक्कै जीत हुने छैन । देशलाई आन्तरिक उपद्रोहमा जाकेर कस्ले पो विजयोत्सव मनाउला र ? यसर्थ राष्ट्रको बृहत् हितलाई शीरोपर गरी संविधान लेखन प्रक्रिया राष्ट्रिय स्वार्थकोलागि स्थगन होस्, केही दिन ।तराई लगायत अन्य जल्दा बल्दा समस्या संबोधन होस् । ६ वर्ष भन्दा बढी ढीलो भएको संविधान लेखाइ अरु पन्द्र दिन ढीलो भएमा केही फरक पर्ने छैन । यस्मा बेवास्ता गरी महोत्वाकाँक्षा पूरा गर्ने  जिद्दी गरिएमा देश चक्रव्यूहमा फंस्न सक्छ । बेलैमा चेतना भया …।

( १६५ ) १२ वर्षे गोदावरी सिंह अस्त मेला 

( १६५ ) १२ वर्षे गोदावरी सिंह अस्त मेला 

दैनिक जीवनका अनुभवहरु 
२०७२ साल भाद्र २२ गते मंगलवार

गोदावरी ललितपुर जिल्लामा पर्दछ । यो काठमाडौँबाट अन्दाजी १४ /१५ किलोमीटर दक्षिण -पूर्वी भागमा पर्दछ ।समुन्द्री सतहबाट ५००० फिट उँचाईमा रहेकोछ । मौसम विज्ञानको भाषामा यसलाई काठमाडौँ उपत्यकाको ” चेरापूंजी” भनिन्छ । छिनछिनमा पानी पर्ने ठाउँ । आज त हामी त्यहाँ रहंदासम्म पानी परेन । छिनछिनमा बदली भयो ।
गोदावरी पौराणिककालदेखि स्थापित एक तीर्थ स्थल रहेछ । प्रत्येक १२ वर्षमा सिंह राशीमा वृहस्पति र सूर्य एकै स्थानमा भाद्र महिनामा पर्न आउँदा  यहाँ १२ / १२ बर्षमा मेला लाग्ने परम्परा रहेछ । गोदावरी भन्ने बत्तिकै एक पवित्र गंगा / नदीको नाम, एक सुन्दर फूलको नाम भन्ने बुझिन्छ । अनेकौं वर्ष पहिले एक जना बहादुर पुरी नाम गरेका सिद्ध योगी बस्दथे । उनी आफ्नो योगवलद्वारा आकाशमार्ग भई भारतको गोदावरी तीर्थमा नित्य गंगा स्नान गर्न जान्थे । एक दिन सपनामा गोदावरी गंगाले उनलाई भनिन्,” अब तिमी यती टाढा स्नान गर्न आउनु पर्दैन , म तिमी बस्ने स्थानमा नै प्रकट हुनेछु, त्यही स्नान गर्नु ।” योगीले कसरी विश्वास गर्ने भनी प्रश्न गरे । गंगाले भनिन् , ” तिम्रो कमण्डलु,माला, खराऊ,चिम्ता,झोली आदि गंगामा विसर्जन गर्नु । प्रमाण स्वरुप पहिला तिम्रा सामान आउने छन् र पछिबाट म प्रकट हुनेछु ।” यस्तै भएछ । त्यसै समयदेखि गोदावरी मेला पर्व शुरु भयो भन्ने कथन रृषभदेव घिमिरेलाई आफ्नो ” गोदावरी संक्षिप्त परिचय,२०७२” भन्ने पुस्तिकामा लेख्नु भएको छ ।

गोदावरी एक  प्राकृतिक सम्पदा हो । प्रकृतिको खुल्ला संग्रहालय हो । देशको एक मात्र बोटानिकल गार्डन यहीं नै छ । यो एक धार्मिक स्थल हो ।एक सांस्कृतिक सम्पदा हो । यहाँ जैविक विविधता छ ।एक पर्यटक स्थल हो । यहाँको हावा, पानी र वातावरणमा आफूलाई हराइ दिन्छन्, पर्यटकहरु । 

म २०४८ मा एक्लै,२०६० मा सपत्नी र २०७२ मा सपरिवार  लगातार मेला भर्न आएं ।तेस्रो पटक कुण्डमा नुहाउने अवसर मिलेन । भीड्मभीडले गर्दा ।जनसागर ओइरिएको ओइरिएकै छ ।एक महिना सम्म मेला लाग्छ । एकातिर यस्तो अवस्था छ भने संविधान निर्माताहरुले देशलाई ” धर्मनिरपेक्ष” घोषणा गर्न लागी परेकाछन् । केही नेतागण भन्छन् – राज्यको कुनै धर्म हुंदैन । तर सनातनदेखि चली आएको धर्मको संरक्षण पनि त हुनु पर्दछ ।
रमाइलो छ गोदावरी मेला । युवायुवतिको अचाक्ली भीड थियो । फेसन परेड जस्तो पनि देखें । बृद्धबृद्धा थोरै देखिन्छन् । खाजा खाना पसलहरु प्रसस्तै रहेका । इलेक्ट्रिक रोटे पींगमा जोड़ीका जोडी फनफनी घुमेका ।सुरक्षाको विशेष प्रबन्ध थियो नै । स्थानीय उत्पादन भटमास,मासको दाल, बोडी,केराउ , अकबरे खुर्सानी, थ-थरीको अचार,खुवा, काँक्रो सबै लोभलाग्दो । किनौ- किनौ लाग्ने । किनी छाडे एक हजार जतिको ।

रमाइलो मान्यौं, हामी सबैले । थकान भने मज्जाले लाग्यो । हाइ गोदावरी ! बाइ गोदावरी ।

( १६४ ) एकै घाटमा दुई शेरले संगै पानी पिउँदैनन् ।

( १६४ ) एकै घाटमा दुई शेरले संगै पानी पिउँदैनन् ।
            शिक्षण जीवनका अनुभवहरु 
           २०७२ भाद्र २१ गते सोमवार

घंटी लागेपछि चक, डष्टर र किताब लिएर अफिस गएं । टेबुलमाथि राखें । बाहिर गएं । बाहिर अवलोकनकर्ताहरु बसिरहेका थिए । एक जनाले भने, ” सर, १८ / २० वर्ष शिक्षण गरेका शिक्षकको पूरै कक्षा अवलोकन गर्नु आवश्यक ठानेनौं, हामीले । अरु प्रतियोगीहरु पनि छन् । एक हप्तापछि रिजल्ट दिने छौं, धन्यवाद ” ,  एक मोटो ,रौं सेतो देखिने, चाक्लो अनुहार भएका ब्यक्तिले  भने ।” सबैलाई ” नमस्कार ” गरी म सिनामंगल चौकतिर लागें । केही किनमेल गर्दै थिएं ।त्यसैबेला कक्षा शिक्षणपछि बोल्ने ब्यक्ति भेट भए । उनले आफूलाई विसंसको अध्यक्ष भएको परिचय दिए । हात मिलाए । 
” मेरो एउटा प्रस्ताव छ । अर्का एक जना योग्य मित्र पनि हुनु हुन्छ । विद्यालय दुई शिफ्ट संचालन हुन्छ । तपाई भिजिटिंग टिचर भएर दिउँसोको शिफ्टको प्र. अ. भई संचालन गर्नुस् । निजले विहानको मा.वि. शिफ्ट संचालन गर्छन् । मिलेर काम गरौं ।”

” सर, यो भिजिटिंग टिचर भन्ने विद्यालय स्तरमा प्रचलित छैन । विश्वविद्यालयमा भिजिटिंग प्रोफेसर हुन्छ । एक विद्यालयमा दुई प्रअ रहनु भनेको विवादास्पद विषय हो । एकै घाटमा दुई शेरले संगै पानी पिउँदैनन् ।”

खिस्स हाँसेर “सी यू” भन्दै बाइक कुदाउंदै गए, अध्यक्ष । ( क्रमश:..)

( १६३ ) त्यतिकैमा अवलोकनकर्ताहरु ह्वारह्वारती कक्षाबाट बाहिरिए । मेरो शान्त कक्षा बिथोलियो ।

( १६३ ) त्यतिकैमा अवलोकनकर्ताहरु ह्वारह्वारती कक्षाबाट बाहिरिए । मेरो शान्त कक्षा बिथोलियो ।

शिक्षण जीवनका अनुभवहरु 
२०७२ भाद्र २० गते आइतवार

अन्तर्वार्ता सहजै सम्पन्न भयो । विद्यालय संचालनमा दिनहुं आउने समस्याहरुबारे तार्किक ढंगले प्रस्तुत हुनु मेरोनिम्ति नौलो कुरा थिएन । अन्तर्वार्ता बोर्डलाई चित्त बुझ्यौ रै’छ । दोस्रो चरणको परीक्षा – कक्षा शिक्षणकोलादि छनौट भएको खबर भोलि पल्ट पाएँ । निर्धारित समयमा पुगें । ११ बजेको समय थियो- दोस्रो पिरियड । कक्षा ९ मा अंग्रेजी विषयमा रहेको “Fables of Aesop”पाठ पढाउने निर्देश भयो । केही अवलोकनकर्ता  कक्षा पछाडि बस्न गए, केही अगाडिको बेन्चमा विद्यार्थीसंगै बसे । अंग्रेजीमा अभिवादन गरे लगत्तै पाठ पढाउन थालें । कक्षा शान्त र नियन्त्रित थियो । पहिलो पंक्ति पढाइ विद्यार्थीहरुसंग प्रश्नोत्तर शुरु गरें । त्यतिकैमा अवलोकनकर्ताहरु ह्वारह्वारती कक्षाबाट बाहिरिए । मेरो शान्त कक्षा बिथोलियो । नरमाइलो लाग्यो ।पाँचै मिनटमा मेरो मूल्याँकन गरे छन् भन्ने लाग्यो । शिक्षणको sequence ( सिलसिलेवार ) नै नहेरी गए, अवलोकनकर्ताहरु । मैले आफ्नो कर्तव्य निर्वाह गर्नु थियो । पूरै समय पढ़ाएँ । कक्षा कार्य समेत दिएँ । ( क्रमश:….)

( १६० ) समस्याग्रस्त शिक्षकलाई कसरी तह लगाउने ?

( १६० ) समस्याग्रस्त शिक्षकलाई कसरी तह लगाउने ?

      शिक्षण जीवनका अनुभवहरु
           
      २०७२ साल भाद्र १६ गते बुधवार

२०४७ साल चैत । गुह्येश्वरी मा.वि. सिनामंगले गोरखापत्रमा “प्रधानाध्यापकको आवश्यक्ता”को विज्ञापन प्रकाशित गर्यो । मैले बुटवलबाट दरखास्त रजिष्ट्री गरी पठाएको थिएं । सम्पर्क मितिमा उपस्थिति भएं ।छनौट प्रक्रिया अन्तर्वार्ता र कक्षा शिक्षण राखिएको ज्ञात भयो । 

अन्तर्वार्ताको दिन भएको प्रश्नोत्तर –
प्रश्नकर्ता १- किन काठमाडौंमा प्र.अ. हुंन चाहनु भएको ? “पीएचडि गर्ने प्लेट फर्म पाउने अाशाले ।”
                 यो पद अस्थायी नि ? ” म स्थायी प्रअ हुँ । सरुवा गरेर आउँछु ।”
प्रश्नकर्ता २- समस्याग्रस्त शिक्षकलाई कसरी तह लगाउने ? 
                 ” शिक्षक कर्मचारीलाई मनोवैज्ञानिक र प्रशासनिक तौरतरिकाले तह लगाउन सकिन्छ । प्रथमत: निजलाई उस्ले गरेको गल्ती, लापरवाहीको नतिजाले विद्यालयलाई असर पारेको उदाहरण दिई सुध्रन समय सीमा तोक्ने । अनुगमन जारी राख्ने । आवश्यक परे दोस्रो पटक लिखित स्पष्टीकरण सोधी सचेत गराउने । सुधार नआए, अटेर गरे ,निजलाई नै बदल्ने अर्थात बर्खास्त गर्ने गरी संचालक समितिमा निर्णय लिने ।” ( क्रमश:)

( १६१ ) स्तरीय पढाइले विद्यालयको आर्थिक स्तरमा सुधार हुन्छ ।

( १६१ ) स्तरीय पढाइले विद्यालयको आर्थिक स्तरमा सुधार हुन्छ ।
          शिक्षण जीवनका अनुभवहरु 

                   प्रश्नकर्ता ३- ” विद्यालयको आर्थिक स्थिति कसरी सुदृढ पार्न सकिन्छ ?”
                    ” Quality education ( गुणात्मक शिक्षा ), योग्य,अनुभवी,तालिम प्राप्त अध्ययनशील र परिश्रमी  शिक्षकहरुको “Team Work”। त्यो टीमलाई प्रोत्साहन प्रदान गर्ने विद्यालय संचालक समिति ।यो अवस्थामा स्तरीय पठनपाठन हुन्छ । यस्तो पढाइ हुंने विद्यालयमा हुनेखानेहरुले आफ्ना सन्तति भर्ना गर्न ल्याउँछन् ।हुंदा खानेहरुले पनि गाँस काटेर नानीहरु भर्ना गर्न ल्याउँछन् । केही शल्क बृद्धि गरे पनि खुसीराजीले तिर्छन्, अभिभावकहरु ।”
प्रश्नकर्ता ४- अन्य केही उपाय पनि छन् कि, सर ?
                 ” छन्, हजुर । विद्यालयको सडक मोहडामा जग्गा, ज़मीन भए कवाल / पसल / सटर निर्माण गरी भाडामा लगाउने । यसबाट स्थायी आमदानी भई रहन्छ । स्थानीय सरकार – नगर पालिका / जिल्ला विकास समिति / NGO /  INGO संग आवधिक योजना देखाइ अनुदान माग गर्न प्रक्रिया चलाउने ।स्थानीय दाताहरुसंग अनुरोध गर्ने । भागवत महापुराणको आयोजना गरी दान संकलन गर्ने । संकलित रकम पूर्ण सदुपयोग गर्न सकियो भने नपुग रकम समेत माग गर्न मिल्छ ।” ( क्रमश: )…

                  

tn pas cher nike tn pas cher golden goose saldi golden goose saldi golden goose saldi golden goose saldi golden goose saldi golden goose saldi air jordan pas cher air jordan pas cher jordan pas cher air jordan pas cher air jordan pas cher hogan outlet online hogan outlet hogan outlet online hogan outlet online hogan outlet online hogan outlet online hogan outlet online hogan outlet online scarpe casadei outlet scarpe casadei outlet scarpe casadei outlet scarpe casadei outlet scarpe casadei outlet