Category Archives: Poem

मुक्तक

मुक्तक

नेता

चिल्ला रोटी खाँदै,
चिल्ला कुरा गर्ने ।

सुकिला, मुकिला ,
भरिला र चिल्ला ।

भोका -नाँगा,
जनताका नेता ।
( २०६७ / ०८ / १५ )

राम्रो

राम्रो

पछ्यौरी खसाली नराख्नु ,
यौवन छोपेकै राम्रो ।

ओंठ जोडी नराख्नु ,
मुस्कान छरेकै राम्रो ।

नयन गिराई नराख्नु ,
निशाना हानेकै राम्रो ।

फूल ओइलाई नराख्नु ,
कपालमा सिउरेकै राम्रो ।

मन मारी नबस्नु ,
भावना पस्केकै राम्रो ।
( २०६७/०८/१९)

काकाकुल काठमाण्डौं

काकाकुल काठमाण्डौं

विकासको गोष्ठी पाँचतारे होटलमा ,
जनताका रित्ता गाग्री सडक पेटीमा ।

कुरा ठूला कागजमा, के को पंच वर्षे योजना ?
जलस्रोतका धनी जनता, पानीको हाहाकारमा ।

पानीनै नपाइने, अरु सपना किन बाँड्यौ ?
पवित्र बागमतीमा, ढल किन मिलायौ ?

भएर नेता मिनरल बोकी,सडक पोल्ने ,
लाटा सोझा हामी सबै, सपना पिई बाँच्ने ?

काकाकुल कान्तिपुर, आऊ कोही बचाऊ ,
शान्ति गरी जनता बाँच्ने, ल उपाय बताऊ ।
———

कविता

दशैं आयो

फूल भन्छ- दशैं आयो ।
घाम भन्छ- दशैं आयो ।
पानी भन्छ- दशैं आयो ।
आकाश भन्छ- दशैं आयो ।

वायु दिन्छ सुवास- दशैं आयो ।
रातो माटो भन्छ- दशैं आयो ।
कमेरो माटो भन्छ- दशैं आयो ।
धानको बाला भन्छ- दशैं आयो ।

यात्री भन्छ- दशैं आयो ।
मालश्री भन्छ-दशैं आयो ।
मठ मन्दिरका घण्ट भन्छन्- दशैं आयो ।
वालवाला भन्छन्- दशैं आयो ।

आयो, आयो दशैं आयो ।
लौ लौ थाप्नुस्-
दशैंको शुभकामना आयो ।
माता दुर्गाको आशिष आयो ।
(२०७०/०६/१९/७)