शैक्षिक जीवनका अनुभवहरु (५६ )
२०७२ वैशाख २९ गते मंगलवार
विद्यालयमा कोकोहोलो मच्चियो ।
आज दिनको १२:५५ मा पुन: नेपालमा भूकम्प आयो । केन्द्र विन्दु कोदारी थियो । शक्ति चाहि ७.४ थियो । मापन फरक फरक उल्लेख भएकोछ ।७.१-७.४ सम्म को रेक्टर स्केल भनिएको छ ।
अजासुहरुले ( अति जान्ने सुन्ने हरु ) ले अब पराकम्पन बाहेक खासै ठूलो जान्न भनेका थिए ।तर जोड्को ठूलो धक्का पाइयो । थप क्षति भयो । यस पटक पनि हामी बुटवलमा नै थियौं ।
हाम्रो टोल नजिकै समित बोर्डिंग स्कूल छ । १२: ५४ तिर भूकम्प गयो । कोकोहोलो मच्चियो । विद्यार्थी आत्तिएर कराएको आवाजले टोलमै कम्पन भयो । अभिभावकहरु तुरुन्तै आ-आफ्ना नानीहरु लिन दौड्दैं आए ।लिएर आत्तिंदैं हस्याँग फस्याँग गर्दै घर तर्फ लागे । धन्न कोही हताहत भएनन् । वैशाक १२ को भूकम्प शनिवार परेकाले विद्यार्थी बाआमाका काखमै घरमा नै थिए । नत्र धेरैको ज्यानको आहुति हुन्थ्यो ।